Sirtqi bo‘lim

Toshkent davlat transport universiteti Oʼzbekiston Respublikasi Prezidentining 2020 yil 4 maydagi “Transport sohasida kadrlar tayyorlash tizimini tubdan takomillashtirish chora-tadbirlari toʼgʼrisida”gi PQ-4703-sonli qarori asosida “Oʼzbekiston temir yoʼllari” aksiyadorlik jamiyatining Toshkent temir yoʼl muhandislari instituti, Toshkent avtomobil yoʼllarini loyihalash, qurish va ekspluatatsiyasi instituti hamda Toshkent davlat texnika universitetining aviakosmik texnologiyalari fakulteti negizida tashkil etilgan. Universitetda Sirtqi boʼlim faoliyat yuritib, boʼlim oʼz faoliyatini Toshkent davlat transport universiteti rektori tomonidan 2020 yil 17 sentyabrdagi 37-U sonli buyrugʼi bilan tasdiqlangan boʼlim Nizomi va rivojlanish Dasturi asosida olib boradi. Mazkur Nizom va dasturlar Oʼzbekiston Respublikasi Vazirlar mahkamasining 2017 yil 21 dekabrdagi “Oliy taʼlim muassasasida sirtqi (maxsus sirtqi) va kechki (smenali) taʼlimni tashkil etish tartibi toʼgʼrisida” gi Nizomlarni tasdiqlash haqida”gi 930-son Qarori va Oʼzbekiston Respublikasi Oliy va oʼrta maxsus taʼlim Vazirligining 2018 yil 24 dekabrdagi “Oliy taʼlim muassasasi Sirtqi boʼlimining namunaviy Nizomini tasdiqlash toʼgʼrisida”gi 1055-son buyrugʼi ijrosini taʼminlash maqsadida tasdiqlangan.

Toshkent davlat transport universiteti Sirtqi taʼlim talabalari jami 60 ta taʼlim yoʼnalishlari boʼyicha 8324 nafar talaba tahsil olmoqda. Ulardan 1-bosqichda 83 ta guruhda 1993 nafar, 2-bosqichda 146 ta guruhda 3035 nafar, 3-bosqichda 91 ta guruhda 1825 nafar, 4-bosqichda 66 ta guruhda 983 nafar va 5-bosqichda 51 ta guruhda 488 nafar talaba tahsil oladi. 

Barcha taʼlim yoʼnalishlari uchun tasdiqlangan oʼquv reja asosida Sirtqi taʼlim shakli uchun ishchi oʼquv rejalar ishlab chiqilgan va tasdiqlangan.

Sirtqi taʼlim talabalari oʼquv jarayoni universitet rektori buyrugʼi bilan tasdiqlangan “Oʼquv jarayoni jadvali” asosida olib boriladi. Jadvalda belgilangan davrga mos ravishda, “Oliy taʼlim muassasasida sirtqi (maxsus sirtqi) va kechki (smenali) taʼlimni tashkil etish tartibi toʼgʼrisida” gi Nizomlarni tasdiqlash haqida”gi 930-son Qaroriga binoan har bir talabaga kamida 15 kun avval “Nazariy taʼlim va nazorat jarayonlarida ishtirok etish”lari uchun chaqiriq xatlari rasmiylashtirib yuboriladi. 

Boʼlimda saqlanishi kerak boʼlgan hujjatlar alohida papkalarda tartibli yuritiladi. 

Toshkent davlat transport universitetida Sirtqi boʼlim talabalarining oʼquv jarayoni, sessiyadan tashqari davrida toʼliq masofaviy tashkil etilgan boʼlib, taʼlim jarayoni universitetning moodle platformasida toʼliq yoʼlga qoʼyilgan. Ushbu platformada rus tilida tahsil oladigan talabalar uchun 153 nomda, oʼzbek tilida tahsil oladigan talabalar uchun 580 nomdagi fanlar yaratilgan boʼlib, fanlardan maʼlumotlar, darslik, oʼquv qoʼllanma va videomateriallar bilan toʼldirilgan. Har bir talaba ushbu platformaga ulangan boʼlib, sessiya jarayonida ishtirok etguniga qadar maʼlumot va topshiriqlarni olib, oraliq nazoratlarni topshirish imkoni yaratilgan. 

Shuningdek, sirtqi taʼlim talabalarining doimiy universitetda boʼlmasligini hisobga olib, har bir guruh uchun Telegram tarmogʼida guruhlar yaratilgan. Bu guruhlar orqali talabalar bilan doimiy aloqa oʼrnatilgan boʼlib, u yerdan barcha qiziqtirgan savollarga javoblar beriladi, navbatdagi sessiya chaqiruv xatlari, dars jadvallari yuboriladi. Shu bilan birga, fanlar boʼyicha ham alohida telegram gruppalar tashkil etilgan va u yerda fan oʼqituvchilari ham qoʼshilgan boʼlib, har bir fan boʼyicha toʼliq tushuntirish, fan materiallarini yetkazish ishlari tashkil etilgan. Bu holat ayniqsa pandemiya davrida juda qulay boʼlib, talabalar uydan chiqmagan holda oʼqituvchilar bilan zoom dasturi orqali uchrashish, savollariga javob olish va topshirish mikoniga ega boʼlganlar. Bundan tashqari, 2020/2021 qabul yilidan boshlab universitetda taʼlimni tashkil etish jarayoni Hemis platformasi orqali yoʼlga qoʼyilib, bu talabalar uchun yanada qulayliklarni yaratdi. Ushbu tizim orqali talabalar qoldirilgan darslar soni, fan boʼyicha baholangan baholarini va navbatdagi kursda oʼqiydigan fanlari, oʼqiyotgan semetri boʼyicha dars jadvali boʼyicha maʼlumotlarga ega boʼlib borishadi. 

Universitetda sirtqi taʼlimning 1-kursiga tavsiya etilgan talabalar uchun “Kredit tizimiga kirish” haftaligi tashkil etiladi. Bunda, talabalarni oʼquv jarayonlari, jumdalan, moodle va Hemis platformasi bilan ishlash va ulardan foydalanish, universitet va undagi yaratilgan imkoniyatlar bilan tanishtirish, fanlar boʼyicha maʼlumot va topshiriqlarni berish ishlari amalga oshiriladi. 

Sirtqi taʼlim talabalariga nazariy jihatdan chuqurroq bilim berishni yoʼlga qoʼyish maqsadida sirtqi boʼlim tomonidan fanlardan dars oʼtadigan professor-oʼqituvchilarni tanlash va tayinlash yoʼlga qoʼyilgan. 

Talabalarning sessiya davriga soha mutaxassislari bilan uchrashuvlar, oʼzaro malaka almashish jarayonlari tashkil etiladi, taʼlim jarayonida yangi laboratoriya dasturlari, jihoz va uskunalardan foydalangan holda master-klasslar tashkil etiladi. 

Shular bilan bir qatorda, sirtqi taʼlim talabalari universitet maʼnaviy-maʼrifiy tadbirlarida ham faol ishtirok etib, bir qancha tanlovlar gʼoliblari boʼlib kelishadi.