Erasmus

O‘zbekiston Respublikasidagi Erasmus+ dasturi vakili hamda NEO loyihasi menejeri Gulshoda Karlibayeva Toshkent davlat transport universitetiga tashrif buyurdi. Xalqaro hamkorlik boshqarmasi hamda Iqtisodiyot fakulteti hamkorligida olib borilgan seminarda Oʻzbekiston oliy taʼlim muassasalari uchun Erasmus+ imkoniyatlari, xususan “Oliy taʼlimda salohiyatni oshirish”, “Yangi kelganlar uchun imkoniyatlar”, “Xalqaro kredit mobilligi”, “Jean Monnet” dasturi haqida trening olib borildi. Bundan tashqari, xalqaro loyihalarda ishtirok etmoqchi bo‘lgan OTM vakillari uchun loyiha g‘oyalarini ishlab chiqishning o‘ziga xos xususiyatlari, loyiha takliflarini tayyorlash bosqichlari va loyihalar sifatini oshirish bo‘yicha tavsiyalar berildi. 

Qolaversa, Ulug‘bek Israilov va Shaxnoza Xolbutayevalar oʻzlarining CBHE “TRIGGER: Markaziy Osiyoda bitiruvchilarning ishga joylashishi uchun qulay shart-sharoitlar yaratish orqali OTM talabalarida innovatsion yondashuvlar, tadbirkorlik ko‘nikmalari va munosabatlarini shakllantirish” loyihasi bo‘yicha tajribalari bilan bo‘lishdilar. Shavkat Hakimovning CBHE “INTRAS (Intelligent Transport Systems): O‘zbekistonda yangi AKTga asoslangan magistratura o‘quv dasturlari” loyihasi yutuqlari hamda Elyor Islomovning ICM loyihalarini samarali amalga oshirish boʻyicha tajribalarni tahlil qilish xususidagi yorqin fikrlari seminarning yanada jonli o‘tishiga turtki boʻldi.

Yevropa Ittifoqining Erasmus+ dasturi boʻyicha “Establishment of training and research centers and Courses development on Intelligent Big Data Analysis in CA” mavzusidagi granti doirasida tashkillashtirilgan yakuniy hisobot seminarida ishtirok etish uchun “Avtomobilsozlik va ishlab chiqarish muhandisligi” kafedrasi katta oʻqituvchisi A.X.Sarmonov, “Texnologik mashinalar muhandisligi” kafedrasi assistentlari S.M. Mirxoliqov va Sh.A. Pirnayev, “Ijtimoiy fanlar” kafedrasi mudiri professor J.S.Ramatov Sloveniya davlatining Primorska universitetida xizmat safari bilan bo‘ldi.

Xizmat safarining dastlabki kunida Primorska universiteti Matematika, tabiiy fanlar va axborot texnologiyalari fakultetida loyiha rahbari Sami Ashur bilan uchrashuv oʻtkazildi.

Erasmus+ granti doirasida tashkil etilgan yakuniy seminar yigʻilishida Big Data analysis dasturlari boʻyicha Toshkent davlat transport universiteti tomonidan qo‘lga kiritilgan natijalar to‘g‘risida loyiha a’zosi Azizbek Sarmonovning hisoboti tinglandi hamda ijobiy baholandi.

Universitetimiz xodimlari xalqaro hamkorlik aloqalarini mustahkamlash bo‘yicha taklif va tavsiyalarini taqdimot shaklida namoyish qildilar. Primorska universiteti professor-o‘qituvchilari Toshkent davlat transport universiteti bilan aloqalarni rivojlantirishga katta qiziqish bildirdi. Tashrif davomida mashg‘ulotlarda ishtirok etish, mahorat darslarini o‘tish, yangi grant loyihasi ustida ishlash kabi vazifalar rejalashtirilgan.

Xalqaro hamkorlik boshqarmasi vakili Xalqaro qishloq xoʻjaligi universitetida bo‘lib o‘tgan Erasmus+ dasturining 35 yilligiga bagʻishlangan Erasmus+ CBHE loyihalarining qishloq xoʻjaligi, suv resurslarini boshqarish va atrof-muhitning oliy taʼlimga taʼsiri boʻyicha klaster yigʻilishida ishtirok etdi. Uchrashuvda “Oliy ta’limda mahalliy salohiyatni oshirish” loyihasi koordinatorlari va guruh a’zolari, Yevropa Ittifoqining O‘zbekistondagi delegatsiyasi, O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi (SISQE) vakillari, Oliy va oʻrta maxsus taʼlim vazirligi vakillari, Oʻzbekiston Respublikasi Qishloq xoʻjaligi vazirligi, Suv xoʻjaligi vazirligi, Oliy taʼlimni rivojlantirish va ilgʻor texnologiyalarni joriy etish markazi, Xalqaro aloqalar boʻlimlari (XRO) vakillari va oliy ta’lim sohasidagi manfaatdor tomonlar ishtirok etdi.

Klaster yig‘ilishining maqsadi: qishloq xo‘jaligi, veterinariya, suv resurslarini boshqarish va ekologiya sohalarida oliy ta’lim sifatini oshirish bo‘yicha tajriba almashish hamda o‘quv dasturlarini ishlab chiqishni joriy etish va ularning samaradorligini oshirishga e’tibor qaratgan holda yetakchi xorijiy ta’lim muassasalari bilan hamkorlikni yo‘lga qo‘yish; so‘nggi yillarda qishloq xo‘jaligini modernizatsiya qilish va jadal rivojlantirishda mahalliy Erasmus+ loyihalaridan biri bo‘lgan “Oliy ta’limda salohiyatni oshirish (CBHE)” yo‘nalishining rolini muhokama qilish; amaldagi va tugallangan loyihalarning natijalari va yutuqlarini manfaatdor tomonlarga targ‘ib qilish va tarqatishdan iborat.

Yig‘ilishda Xalqaro qishloq xo‘jaligi universiteti a’zolari bilan hamkorlikda logistika va qishloq xo‘jaligini uyg‘unlashtirish asosida ishlab chiqilgan Erasmus+ loyihasini yaratish to‘g‘risida qaror qabul qilindi.

Universitetimiz Erasmus+ dasturlari bilan birgalikda ko‘plab loyihalarni amalga oshirishni o‘z oldiga maqsad qilmoqda.